2010 оны 1-р сарын 20-нд Мэдээлэл, шуудан, харилцаа холбоо, технологийн газар (МШХХТГ) -ын санаачлагаар Мэдээллийн технологийн Үндэсний Парк, Монголын худалдаа аж үйлдвэрийн танхим, Монголын програм хангамж үйлдвэрлэгчдийн холбоо хамтран зохион байгуулсан Монголын програм хангамж үйлдвэрлэгчдийн чуулга уулзалт МТҮП-ын хурлын их танхимд амжилттай болж өндөрлөлөө.

Тус уулзалтаар МШХХТГ-аас өнгөрсөн онуудад Цахим Монгол хөтөлбөрийн хүрээнд хийсэн ажлууд, энэ онд засгийн газрын санхүүжилтээр хэрэгжүүлэх төсөл хөтөлбөр, тендерүүдийн талаар мэдээлэл өгч, салбарын төлөөлөгчидтэй санал солилцсон юм.

Өнөө цагийн хамгийн хурдацтай хөгжиж байгаа салбар бол мэдээллийн технологи гэдэгтэй маргах хүн гарахгүй. Харин энэ хөгжлийн үсрэлтийн тулгуур шидэгч нь програм хангамж, түүний зохиогч нар юм.

Алдартай Microsoft, Apple, Google, Nokia, Samsung, Motorolla гэх мэт мэдээллийн технологийн дэлхийн зах зээл дээр давамгайлдаг тоглогчид үндсэндээ програмистуудын оюуны бүтээлийг борлуулж байдаг. Өөр өөрийн систем, өөр өөрийн програмыг хэрэглэгчдийн хүртээл болгох замаар эхлүүлсэн тэдний бизнес одоо хүн төрөлхтний өдөр тутмын амьдралын зайлшгүй хэрэглээ болжээ.

"Тайваний мэдээлэл, холбооны салбарын хөгжилт: Өнөөгийн байдал, Чиг хандлага, Үйлдвэрлэл, Судалгаа, Хамтран ажиллах боломжууд “ сэдэвт лекц  МТҮП-ийн хурлын танхимд 2010 оны 1 дүгээр сарын 21-ний өдөр  боллоо.

Энэхүү лекцэнд ШУ-ны доктор, Профессор Б. Сүхбаатар Тайванд томилолтоор ажилласан тухайгаа дараах чиглэлээр ярилаа.

• Тайпэй хотноо зохиогдсон “ IT Month” үзэсгэлэнгийн тухай
• Компьютерийн үйлвэрлэлийн өнөөгийн байдал, шинэ ололтууд
• Шинэ үеийн радио холбооны зарим төхөөрөмжүүдийн тухай
• Робот техникийн хөгжлийн ололт, цаашидын чиглэлүүд
• GPS системийн хөгжилт
• e-book reader-ийн тухай
• Гар утасны талаархи шинэ мэдээллүүд
• Их дээд сургуулиудаар зочилсон талаар

Энэхүү лекцийн үндсэн агуулгыг дараах хаягаас татаж авна уу.

https://download.yousendit.com/TzY1QndJNHZFd2RMWEE9PQ

Монгол Улсын Ерөнхий сайд С.Батболдын чиглэл болгосноор харилцаа холбооны үйлчилгээний үнэ тарифт өнөөг хүртэл мөрдөж ирсэн хот, хөдөөгийн ялгааг байхгүй болгоод байна. Энэ нь манай харилцаа холбооны салбарт цоо шинээр хэрэгжүүлж байгаа газар зүйн байрлалаас үл хамаарах ижил тарифаар үйлчилгээ авах боломжийг анх удаа хэрэглэгчдэд нээсэн түүхэн шийдвэр юм. Өнөөдөр Ерөнхий сайд С.Батболд эл шийдвэрийг Мэдээлэл, шуудан, харилцаа холбоо, технологийн газрын дарга Ж.Сансар, Харилцаа холбооны зохицуулах хорооны дарга Б.Болдбаатар, Мобиком, Скайтел, Юнител, Жи-Мобайл, МЦХ компаний захирлуудын хамт баталгаажуулан, баримт бичигт гарын үсэг зурах ёслолын арга хэмжээнд оролцов.